મુખ્ય મંત્રીશ્રી નરેન્દ્રભાઇ મોદીને આંતરરાષ્ટ્રીય મહિલા દિવસની શુભેચ્છા આપવા આજે વિધાનસભાના ભાજપાના તમામ મહિલા ધારાસભ્યોનું પ્રતિનિધિમંડળ મહેસૂલ મંત્રી શ્રીમતી આનંદીબેન પટેલના નેતૃત્વમાં મળ્યું હતું. ગુજરાત સરકારે સ્થાનિક સ્વરાજ અને પંચાયતી રાજની સંસ્થાઓમાં પ૦ ટકા મહિલા પ્રતિનિધિત્વનું કાનૂની વિધેયક પસાર કરીને અને મહિલા ગૌરવની અનેકવિધ પ્રસશ્ય પહેલ કરીને રાજ્યની નારીશકિતના સામર્થ્યને આગવી પ્રતિષ્ઠા અપાવી છે.
ભાજપાના મહિલા ધારાસભ્યશ્રીઓએ સાર્વજનિક જીવનમાં જનપ્રતિનિધિ તરીકે જે અવસર પ્રાપ્ત થયો છે તે માટે સેવાસંકલ્પની પ્રતિબધ્ધતા વ્યકત કરી હતી.